اشعار ترکی
یالان دنیا( استاد شهریار)
سنین بهرن یئین کیمدیر؟
کیمینکیسن؟ ییهن کیمدیر؟
سنه دوغرو دئین کیمدیر؟
یالان دونیا، یالان دونیا!
سنی فرزانه لر آتدی
قاپیب، دیوانه لر توتدی
کیمی آلدی، کیمی ساتدی
آلان دونیا،ساتان دونیا
آتی ازل داغا سالدیق
یورولدوقجا دالی قالدیق
آتی ساتدیق، اولاغ آلدیق
یهر اولدی پالان دونیا
بیری آینا ، بیری پاس دیر
بیری آیدین، بیری کاس دیر
گجه تویدور، گونوز یاس دیر
گول آچدیقجا، سولان دونیا
ایگیت لرین باشین یئیهن
گوجالار بوزباشین یئیهن
قبیرلرین داشین یئیهن
ئوزی یئنه قالان دونیا!
نه قاندین، کیم گول اکن دیر؟
کیم قیلیج تک قان توکن دیر؟
تیمور هله کوره کن دیر
چنگیز جانین، آلان دونیا
یامان قورغو! ییغیلایدین!
طوفانلاردا بوغولایدین!
نولایدی بیر داغیلایدین
بیزی درده سالان دنیا
چاتیب، سندن کوچن کئچدی
اجل جامین، ایچن کئچدی
اولان اولدو، کئچن کئچدی
نه ایستردین اولان دونیا
بوغولایدین، دوغان یئرده
دوغوب خلقی بوغان یئرده
اوغول نعشین اوغان یئرده
آنا زولفون یولان دونیا
